BIRLIBIRLOQUE: ¡¡¡ REXUVENECIMOS !!!

La edá azquier importancia y tamañu porque, de manu, identifícase con la vía. Van pasu a pasu, como de la man. Y tamién, porque, quietoparau, acábense a la vez.

Aparte, tién otra consideración ponderable. Siend´un díxitu en permanente y callá adición, acábase de sopetón, cuando i-llega la prueba del nueve y apaez en escena la guadañona a interponese nel pasu temporal aquel. To, por culpa d´Eva.

Puén mentase de soslayu otres cualidaes complementaries y casi anezdótiques. Que si tién que ser mayor la del paisanu que la de la muyer pa casase. Que, como lo otro, nun importa´l tamañu. Que tampoco ye malo dir faciéndose mayor ya que, a cierta edá, apaez, como fechu millagrosu, la paradoxa de la sabiduría. Que, sumadre, como a la meta, hai que llegar.

Y finalmente, la característica mas importante y po la que la traigo a colación aquí. La edá nun tién retrocesu posible. Azviértovos: nunca, ningún de nosotros ni de vosotros, ningún, va poder ser mas xoven que lo que ye nest´ istante. Paez una perogrullá, ya, pero solo lo paez. Ya vereis. Al granu.

Llevanteme esta mañana la mar de contentu. Había teníu un sueñu con final feliz. Perseguíenme unos tanagras po la Cerancha. Paradoxa nun esplicá nos titulares: a mi costábame llevantar los pies del suilu y ellos corríen como centelles negres jamaicanes. Nun mismu planu cinematográficu, yo diba en cámara lenta, y ellos al rizmu de trotacaminos. Teníalos tras la oreya, a puntu garrame, mediu angustiau y a puntu berrar, …cuandu consigu arribar al cantu la cera y a la vista del precipiciu, zaca, paez como que me precipito y … empiezo a planear sobre el pueblu a la vez que facía la cartografía 3D local, a mou del google maps, de Caborana. Oye, deputamadre, tú, como pa quejase.



Tan contentu taba que igual me daba almorzar unes casadielles, qu´unos frisuelos, qu´un trozín de bizcochu. Como siempre, eso si, con la radiu prendía. Y oigu la noticia que me diba redondear el dia,…

• - Telvina, ven pa quí

• - Qué te pasa, paisanín míu

• - Joder, qu´acabo de rexuvenecer, d´un ostiazu, dos añinos

• - Tas llocu.

• - Nomenó. Dixéronmelo po la radio.

• - Pero, si esos nun te conocen.

• - Que sí.

• - Nin saben el día nel que naciste.

• - Quiés venir, o no

• - A ver, esplícamelo

• - Trai un papelucu, porque ye menester facer unos números

• - Ya tas como el Kaniska

• - Non, Telvina, non

• - Acuérdate qu´él paraba los reloxes, que a fin de cuentes ye lo mismu si consigues qu´el efectu dure dos años seguíos

• - Coñu, no

• - Venga, anda, soy toa oíos, con llapiz nel ristre
  

• - Mira, con los años que tengo, ¿cuantu me falta pa xubilame?

• - Tol dia me lo mentes. Todios prexubilau y yo …..Nun tengu falta char cuenta alguna: fáltente nueve años.

• - Ya, tas no cierto, pero si facemos la resta como diz el gobiernu, réstayi a 67 la edá y …cuántos me falten, eh, ..cuántos.

• - Coyones, once

• - Entós, ¿rexuvenecí o no?

• - Paez un millagru, sí. Y, a mi, por qué nun m´eches les cuentes, ¿pásarame lo mesmo?

• - No. Qué va. No, porque tú nun trabayes.

• - Así que , quiés dicir, que depende de trabayar o no el fechu de rexuvenecer

• - Sí

• - Entós, marcho a apúntame al paru, que como siga esto así voy alcanzate y, recuerda, que casémosnos porque tu teníes cuatro años mas que yo

• - Nun corras, muyer, que p´aplicar esta nueva propiedá de la resta hay que tar apuntá po lo menos veinticincu años.

• - Suputamadre, una eternidá.

• - Xacto. La mesma que tendré que durar yo pa poer cobrar la pensión