Terminose la estancia becá pol CALEYERU na Emilia Romaña pa seis estudiosos ayeranos, dos d´ellos de Caborana. Ya vos había anticipao que la Universidá de Bolonia, ahora tan de moa, había organizao unes xornaes didáctiques acerca del legau cultural qu´el pasu de Isongu el nuestru por esa ciudá había dexao en sus istituciones mas significatives.
Ya sabeis, y si non apuntolo yo agora, que la Emilia Romaña ye una rexión situá entre Llombardía y el Vénetu, ye dicir, muncho mas allá de Ujo, onde se pensaba que había parao Isongu cuando coló de Caborana, muy rica y próspera, en la que abunden les ciudaes con destacau patrimoniu artísticu. Nosotros, los de Caborana, aún tando llejos de casa, sabíamos que Emilia, después de esfocicar Isongu entre toa la variá muestra de muyeres romanes en porrica nes múltiples fiestes berlusconianes de la nobleza capitalina a les que, en sin perder comba, diariamente acudía, yera, ni mas ni menos, que la putanga de la que se había encoñao el caboranense en Roma. Y como la mozona yera natural de Bérgamo, furtiaba hasta allí con relativa frecuencia, ausencies que afectaben al ánimu de nuestru héroe local, atristallau en Roma augusta, y que ficieron que los Jurisconsultos mas influyentes con los que trabayaba consiguieran del Emperaor la construcción de la Vía Emilia - camín pa llegar nuntrís desde Roma hasta Emilia, que to tién una esplicación, aunque munches veces los italianos ignórenlo - - pa que Isongu pudiera subir, por una vía recta y rápida, a sofocar su desconcertante furor pasional entre les carnes d´Emilia, y que aún hoy conserva el nome de la bella rapazona del norte. Por cierto, agora, coses del progresu, llámenla tamién autoestrada, ni Emilia ni Otilia, y fáente coyer un boletu a la entrá y, al entregalu a la salía, pídente unes perruques, les que yos paez , sin consultate, conviertiéndose, por arte de los cuestores actuales, en una vía recaudatoria en llugar del camín ilusionante, placenteru y recreacional que recorrió, esmaneu y babeante Isongu el de La Pruvía.
Como les cabres tiren siempre pal monte, nosotros, tando un poco como elles, instalámonos en plenos Apeninos. Y desde allí asistimos a la programación boloñesa y fuimos investigando la influencia del pasu de Isongu por tos aquellos parajes.
Ya vos diré contando. Pienso que va dame pa llenar el espaciu del Blog durante unos años. Pero, nuntejode, na mas dar con Bérgamo, a mediu día, con una fame de ladedios, acercámonos a rucar, inmersos en nuestru sentíu comprometíu, a un sitiu que llamaben la Cooperativa porque contáronmos que los beneficios que sacaben invertíenlos en nun sé que proyectos sociales. Total que nos dixeron que lo que yera típico d´allí yera la polenta, espetonos una mozona enorme y malencará. Pues, trainos unes racionuques abundantuques, italianona delpijo. Y qué creeis que nos apurrieron, ¿eh?,…pues unes fariñes. Sería cabrón y socarrón el Isongu. Unes fariñes sabemos tos lo que son, pero si sei cambia el sexu al nome y dizse esto ye polenta, aparenta esóticu manjar. Puta, …mas que puta, yera el Isongu. Y con tal condición, montolos a pelu a los bergamianos. Faricos ye lo que comen, na creencia que jalen polenta.
En Parma, Fidenza, Módena, Bolonia, Imola, Rávena,… y pueblos menores, saben date razón de Isongu. Contarevos to lo que nos dixeron. Será cuando ordene un poco los papeles.
