HABRÁ MUYERES

jueves, 14 de enero de 2010









En Caborana, pasámonos. Adviértenme, nun correu lectrónicu, qu´esti va ser un añu femenín allí. Y yo que soy descendiente diretu, a muncha honra, de los Ingenuos de Legalidá, díxeme d´inmediatu, a boteprontu, na ma lletrear l´enunciau, na, qué pué ser, qu´el apeaeru´l Vasco, masculín pol xéneru, pasa a llamase l´estación, femenín po lo mesmo. Pero, quiá, los morrillazos apuntaben pa otru espantapáxaros. Dicen y recalquen que esti va ser l´añu de la muyer. Y a mi, qué quereis que vos diga, jódenme eses rotundidaes. Además, cuéstame concluir, por contraposición, que nun lu fuera l´anterior, o l´anterior del anterior. Pero, paez que quien eso pué disponer, decidió que lu fuera. Así que, ¡jódete, navaya!.


Ya tais. Non. Nun disloquéis el porretu. No. No. Bueno, val, si quereis daiyi al tarru, allá vosotros, pero nun ye como atarranchais, eso de que vayan alquilar una cabalgata de xóvenes, roxies y forníes rapazones polaques, excedentes de la recoxía de la fresa nel Egido, pa empaquetar la cosecha de viruéganos de la escombrera del Quintu. Nun ye eso. Quitai pallí. Tampoco ye que´l Alcalde haya decidío, una vez mas, casase y haya determinao, nun Bandu, que la fórmula pa elexir la consorte va ser la mesma que ca añu usa y disfruta el kafre magnate de Swezilandia. No. Nun ta pa esos trotes. Que no. Ni ye que piensen retomar la idea de convocar un nuevu Concursu de Miss Curripa. Qué va. Ni, pordios, nuestru equipu femenín de ruby retó mediante un públicu desafíu al homónimu de New Zeland. Que no. Ni de coña. Tampoco, por muncho que lo anuncie la MTV, el conciertu, en directu, de presentación de la última canción de Beyoncé titulá Les Llavanderes del Canamal, va tener llugar nel altar de l´Iglesia local. Y, de ninguna manera, nun se vos pase po la mollera, malpensaos, que la cazurra, la cazurra, dixe bien, que va presidir la Fundación Príncipe d´Asturies, sustituyendo a Chano el de Morea, pa resolver tamañu irresponsable anacronismu, haya decidío empadronase en Caborana. Fríu, fríu, como´l tiempu cabrón. Bueno, después de haber negao to lo anterior, tengo que negar tamién qu´en la pitanza anual qu´organixen los Amigos de Caborana vayan amenizar el vinu de recepción de los participantes, en toples, les moruques qu´allegren les noches del Tornillos y llegaes a Caborana como resultau de la aplicación de la Ley de la Memoria Histórica pa restituir el escarniu ocasionau po la permanencia de los moros nel pueblu. No. Na d´estravagancies. Ni esa comida va servise, como paez que ye l´última moa, sobre xóvenes, tersos y turxentes cuerpos femeninos, totalmente en porrica, cuyes carnes irán descubriéndose a medía que les viandes se vayan consumiendo y atragantandu, doblemente, al personal. No. No. Y no.


Ye que, felizmente, los organizaores de la citá Comía decidieron que a la misma van asistir nuestres muyeres. ¡Qué enrevesaos sois!. Nun dais una. Nun hai que llevar a la santa. No. Por exemplu, la tuya y la mía, que son galegues, farán el Camín de Santiagu, pero, nesti menester, tócayos cuadra. Tan convocaes les muyeres de Caborana. ¡Norabuena!. Co nelles, tras la fartura, recordaremos y reiremos entrañablemente.











4 comentarios:

Anónimo dijo...

Me parece que confundiste el sentido del correo. No creo que Tino de un pasu pa trás.

Anónimo dijo...

eso quisieses enamorau...perdón, exiliau.

Anónimo dijo...

Tino: ¡ni un pasu atrás!. Que les cocines ahora son muy amañoses.

El gallu dijo...

Hola hermanu.Gustome la de Dios lo de Ahití y también lo de nieve.Escribes bien condenu.Sigo pensando que la caída fue en San Martín.Estoy a la espera de que me publiquen una carta donde hablo de esti tarugo llamado Mancilla.Si ye así ya te la mandaré.¿Animeste a ir en bici a Santiago?.Ye en junio.