FUE EN NORMANDIE EL DESEMBARCU

Finiquítase to, crisis de llau. Allocaos díes de recaos, estudios y cellebraciones. Que si, por orden, retornar les fueyes prestaes nel Louvre. Que si nun taba la rapaza de la otra vez. Celine. ¿Celine?. Sí, coño, Celine. Y ca vez que los espatuxábamos, rodeábennos forníos guardies de seguridá. Y así, sales y sales. Controles y controles. Como siguen falando de aquella manera suya, qu´ellos llamen francés, pa mi que, apreciación personal, nun nos entendíen. Así que dexamos los papelucos nel fondu d´un de los sarcófaos robaos por ellos en Egipto pa que, cuando dieran co nellos, cellebraran un nuevu nacional descubrimientu documental nel Museu.

Alocución elocuente y emocioná de Sarkozy nel homenaxe
a Isongu, el nuestru

Después, Normandía. Homenaxe d´un emocionau Sarkozy a Isongu. Referencies a su aportación a la arquitectuta tradicional normanda. Y a la fabricación de la sidra, cidre pa ellos, mira que son retorcíos. Herencies de sangre, tras 2000 años. Reminiscencies de su sabiduría civilista nel Códigu Napoleónicu. Y hospitalidá. Pué ser la síntesis apresurá, na mas arribar y en sin desfacer el maletu. Tiempu habrá pa desfacelu y dir colocando les coses en su sitiu. El de nuestra historia. El del desembarcu, no yanki, sino de Isongu, en tierres normandes.

Casa que teníen destiná pa los de Caborana
y de la que fuimos huéspedes